កីឡាករ Thiery Henry បានប្រកាសចូលនិវត្តន៍ហើយ

វីរបុស​​របស់​ក្លិប ​Arsenal​ និង​ Barcelona​ កីឡាករ​ Thiery Henry​ បាន​ប្រកាស​ចូល​និវត្តន៍​ហើយបន្ទាប់​ពី​កុង​ត្រា​របស់គេ​ជាមួយ​នឹង​ក្លិប​ New York Red Bull ត្រូវបញ្ចប់​ ។
ក្នុង​អាជីព​ជា​កីឡាករ​បាល់ទាត់​២០​ឆ្នាំ​មកនេះ​កីឡាករ​ Thiery Henry ធ្លាប់លេងនៅក្លិប AS Monaco , ក្លិប Juventus , ក្លិប Arsenal , ក្លិប FC Barcelona និង New York Red Bull ។

កីឡាករ​រូបនេះផ្តើមអាជីពដំបូងរបស់ខ្លួននៅក្លិប Monaco ក្នុងឆ្នាំ១៩៩៤ ហើយបានជួយក្លិបនេះឈ្នះពាន Ligue 1 នៅឆ្នាំ១៩៩៧ ក្រោយមកគេបានចាកចេញពី Monaco ទៅលេងនៅក្លិប Juventus ។​

ក្នុងឆ្នាំ១៩៩៩ លោក Arsen Wenger បាននាំយកកីឡាកររូបនេះក្នុងតម្លៃខ្លួន១១លានផោនពីក្លិប Juventus មកចូលរួមជាមួួយក្លិប Arsenal ។ ពេលចូលរួមជាមួយក្លិប Arsenal រូបគេទទួលបានជោគ​ជ័យ​​យ៉ាង​ខ្លាំងនៅក្លិបនៅអង់គ្លេស​មួយនេះ​ ដោយរូបគេស៊ុតបញ្ចូលទីបាន១៧៨គ្រាប់ក្នុងការបង្ហាញ​ខ្លួន​ ២៥៨ប្រកួត ដោយ​ក្នុង​នោះ​កីឡាកររូបនេះបានជួយអោយ Arsenal លើកពាន English Premier League ចំនួន២ដង និង FA Cup ចំនួន៣ដង ។

ក្រោយមកនៅឆ្នាំ២០០៧ រូបគេបានចាកចេញពី Arsenal ហើយបានចូលរួមជាមួយក្លិប FC Barcelona​ ដោយនៅទីនោះកីឡាករ Henry ក៏បានទទួលជោគជ័យខ្លាំងផងដែរដោយបានជួយ Barcelona​ លើកពាន UEFA Champion League នៅឆ្នាំ២០០៩  ជួយក្លិបនេះលើកពាន La Liga ២ដង ពានCopa delray ១ដង ពានSpanish Super Cup ១ដង ពានUEFA Super Cupចំនួន១ដង និង FIFA Club World Cup ចំនួន១ដង ។

ចំណែកក្នុងការលេងអោយជម្រើសជាតិបារាំងវិញកីឡាកររូបនេះ ស៊ុតបាន៥១គ្រាប់ ក្នុងការបង្ហាញ​ខ្លួន​១២៣ ប្រកួត ។ គេជាសមាជិកមួយរូបរបស់ជម្រើសជាតិបារាំងដែលបានលើកពាន FIFA World Cup នៅឆ្នាំ១៩៩៨  និង ជាសមាជិកជួយបារាំងឈ្នះ European Champion នៅឆ្នាំ២០០០ និងឈ្នះពាន Confederation Cup នៅឆ្នាំ២០០៣ ។

ប្រភព ៖ Eurosport

អត្ថបទ ៖ Mr Ball